Rev 6 | BOJ | STEP | Onaqa e olo ŋam atsimqa buk naŋgi na lubtosib kandel aqa namur na qandrato 7-pela-teb qaji di Kaja Du na ojesosiqa kandel aqa namur namba 1 waqtonaq unem. Waqtonaqa wagme ŋambile so qaji matu a namoosiq marej, “Ni au.” Aqa kakoro di kola anjam ato bulonaq quem.

Revelation of John 6

Kaja Du na buk naŋgi na lubtosib kandel aqa namur na qandrato-7-pela-teb qaji di waqteleŋej

1 Onaqa e olo ŋam atsimqa buk naŋgi na lubtosib kandel aqa namur na qandrato 7-pela-teb qaji di Kaja Du na ojesosiqa kandel aqa namur namba 1 waqtonaq unem. Waqtonaqa wagme ŋambile so qaji matu a namoosiq marej, “Ni au.” Aqa kakoro di kola anjam ato bulonaq quem. 2 Degsi marnaqa e olo ŋam atem di hos qat bei brantonaq unem. Tamo hos quraq di awesoqnej qaji a aŋ ti awesonaq unem. Naŋgi na gate tatal wala ti yonabqa aqa gateq di atsiqa qoto siŋgilaqa marsiqa gilsiq qoto siŋgilaoqnej.

3 Onaqa Kaja Du na kandel aqa namur namba 2 waqtonaqa wagme ŋambile so qaji namba 2 na marnaq quem, “Ni au.” 4 Degsi marnaqa hos bei brantej. Hos di lent. Naŋgi na tamo hos quraq di awesoqnej qaji a siŋgila yonabqa a na tamo uŋgasari mandamq di soqneb qaji naŋgi areqalo niñaqyetnjrnaqa naŋgi lawo kumbra uratosib tamo naŋgi ñumsib moiotnjroqneb. Naŋgi na a serie kobaquja yonabqa gilsiqa wau di yoqnej.

5 Ariya Kaja Du na kandel aqa namur namba 3 waqtonaqa wagme ŋambile so qaji namba 3 na marnaq quem, “Ni au.” Degsi marnaqa hos tulu brantonaq unem. Tamo hos quraq di awesoqnej qaji aqa baŋq di skel ojesonaq unem. 6 Unsimqa wagme qolqe ŋambile so qaji naŋgo ambleq dia tamo bei na anjam marnaq aqa kakoro quem. A na tamo hos quraq di awesoqnej qaji di endegsi minjej, “Ni na tamo uŋgasari mandamq di unub qaji naŋgi mam koba enjre. Yimqa wit aqa awai tulaŋ goge oqimqa tamo uŋgasari naŋgi silali kobaquja waiyoqnsib wit kiñala oqnqab. Tabir qujai segi oqnqab. Bali dego kiñala oqnqab. Tabir qalub segi oqnqab. Deqa ni que. Ni oliv ŋamtaŋ ti wain sil ti ugeugeiyaim.” A degsi minjnaqa gilsiqa wau degsi yej.

7 Onaqa Kaja Du na kandel aqa namur namba 4 waqtonaqa e wagme ŋambile so qaji namba 4 aqa kakoro quem. A na marej, “Ni au.” 8 Degsi marnaqa e olo ŋam atsimqa hos merient branto-naq unem. Tamo hos quraq di awesoqnej qaji aqa ñam Moio. Moio qure na a daurysiq laqnej. Onaqa naŋgi aiyel siŋgila osib tamo uŋgasari mandam taqal qujaiq di so qaji naŋgi serie na ti mam na ti ma uge na ti wagme juwaŋ na ti ñumnab moreŋeb. Mandam taqal qalubq di so qaji naŋgi uratnjrnab soqneb. Naŋgi ñumosai.

9 Ariya Kaja Du na kandel aqa namur namba 5 waqtonaqa tamo uŋgasari nami moreŋeb qaji naŋgo qunuŋ atra bijal sorgomq di sonab unjrem. Tamo uŋgasari naŋgi di Qotei aqa anjam siŋgila na ojesosib mare mare laqneb deqa jeu tamo naŋgi na naŋgi ñumnab moreŋeb. 10 Naŋgo qunuŋ tulaŋ koba leleŋosib Qotei endegsib minjoqneb, “O Tamo Koba, ni iŋgi iŋgi kalil naŋgo Mandor Koba. Ni gaigai kumbra bole tiŋtiŋ yeqnum. Ni getento koba. Ni kumbra bole segi yeqnum. Deqa ni na merge. Iga bati gembub tariŋonamqa tamo uŋgasari mandamq di unub qaji naŋgi na lignab gago leŋ aiej deqa ni kamba ñumqam?” 11 Onaqa Qotei a gara jugo qat olekokba eleŋosiqa naŋgi segi segi jigetnjrsiqa minjrej, “Niŋgi mati kiñala aqaratosib tariŋoqnsib soqniye. Jeu tamo naŋgi na niŋgi liŋgeb dego nuŋgo kadoi naŋgi ti nuŋgo was naŋgi ti degsib olo ñumqab. Tamo gembub jeu tamo naŋgi na ñumqab di e segi na maritqa naŋgi kalil ñumekritib kereamqa bati deqa e kamba naŋgi ñumqai. Naŋgi na niŋgi liŋgnab nuŋgo leŋ aiej deqa e kamba naŋgi ñumit naŋgo leŋ aiqas.”

12 Ariya Kaja Du na kandel aqa namur namba 6 waqtonaqa e olo ŋam atsimqa mimiŋ tulaŋ kobaquja donaq unem. Unem di seŋ tulaŋ ambruosiq gara tulu bulej. Bai tulaŋ lentosiq leŋ bulej. 13 Onaqa bongar naŋgi laŋ goge dena ululoŋosib mandamq aieb. Jagwa koba bosiqa qura qunjimyeqnaqa gei qoqi ululoŋosib mandamq aieqnub dego kere. 14 Laŋ dego loumej. Qobuŋ rer qalsib lubteqnub dego kere. Mana ti nui ti kalil naŋgo soqneb qaji sawa uratosib jaraieb. 15 Jaraionabqa mandor kokba ti tamo ñam ti qaja tamo gate ti ñoro tamo ti tamo siŋgila naŋgi ti kaŋgal tamo ti tamo laŋaj ti kalil naŋgi di unsibqa ulaugetosib jaraiosib meniŋ kokba naŋgo miligiq dia ulieleŋeb. Osib mana miligiq dego ulieb. 16 Uliesosib naŋgi tulaŋ leleŋkobaiyoqnsib mana ti meniŋ kokba ti kalil endegsib minjroqneb, “Niŋgi bosib iga kabutgibqa Qotei awo jaram kobaq di awejunu qaji a na iga nugwasai. Kaja Du aqa minjiŋ dego gagoq bqasai. 17 Di kiyaqa? Qotei naŋgi Kaja Du wo tamo uŋgasari naŋgi qa minjiŋ oqetnjrqa bati agi brantqo. Deqa tamo yai na naŋgo siŋgila gotraŋyqa kere? Tamo dego bei sosai.”